ఆరోగ్యం, ఐశ్వర్యం ప్రసాదించే అపురూప మరకత శివలింగం!

🕉️ 📍పాలకొండ, పార్వతీపురం మన్యం జిల్లా,:

సకల లోకాలకు పతి అయిన భోళాశంకరుడు, పరమశివుడు భక్తుల కష్టాలను పోగొట్టే దయామయుడు. శివలింగ రూపంలో ఆయనను ఆరాధించడం అత్యంత శక్తివంతమైనదిగా శాస్త్రాలు చెబుతున్నాయి. ద్వాదశ జ్యోతిర్లింగాల సరసన నిలిచే మరొక విశిష్టమైన రూపం, ముదురు ఆకుపచ్చ రంగులో మెరిసే “మరకత లింగం”. నవరత్నాలలో ఒకటైన ఎమరాల్డ్‌ రత్నంతో తయారయ్యే ఈ లింగం నుంచి వెలువడే దివ్యశక్తి శారీరక, మానసిక ఆరోగ్యాన్ని, అపారమైన సౌభాగ్యాన్ని ప్రసాదిస్తుందని పురాణాలు చెబుతున్నాయి.

🌿 పరిపూర్ణ ఆరోగ్యానికి, ఐశ్వర్యానికి మరకత లింగార్చన.

పార్వతీపురం మన్యం జిల్లా, పాలకొండ శిరిడి సాయి నగర్‌లోని శ్రీ షిరిడి సాయిబాబా సకల దేవతాలయంలో నెలకొని ఉన్న లలితా త్రిపుర సుందరి దేవి సమేత అమృత మృత్యుంజయ స్వామి ఆలయం ఈ అరుదైన మరకత శివలింగం కారణంగా ప్రత్యేక ఆకర్షణగా మారింది. ఈ లింగాన్ని పూజించడం వల్ల భక్తులు —

 * శారీరక, మానసిక ఆరోగ్యం, రోగాల నివారణ.

 * జ్ఞానం, విద్యాభివృద్ధి.

 * సుఖసంపద, అష్టైశ్వర్యం పొందుతారని పండితులు పేర్కొంటున్నారు.

జ్యోతిష్య ప్రాధాన్యత: మరకత రత్నం నవగ్రహాలలో బుధుడికి (Mercury) ప్రీతికరమైనది. ఈ లింగాన్ని ఆరాధించడం ద్వారా బుధ గ్రహ దోషాలు తొలగి, జ్ఞానం, వాక్చాతుర్యం, వ్యాపారాభివృద్ధి కలిగి సర్వశాంతి లభిస్తుందని భక్తుల ప్రగాఢ విశ్వాసం.

నిత్య, ప్రత్యేక పూజలతో అలరారుతున్న ఆలయం

ఈ ఆలయంలో ఆలయ వ్యవస్థాపకులు దివంగత పల్ల బాబ్జి కుమారుడు పల్లా  కొండలరావు  ప్రతిష్ఠించిన మరకత శివలింగానికి ప్రధాన అర్చకులు పర్రి శరత్  ఆధ్వర్యంలో నిత్యం, ప్రత్యేక దినాలలో విశేష పూజలు నిర్వహిస్తున్నారు.

🕕 ప్రతిరోజు ప్రదోష వేళలో మానస పూజ:

ప్రతి దినం సాయంకాలం, శివారాధనకు అత్యంత ముఖ్యమైన ప్రదోష వేళలో మరకత శివలింగానికి ప్రత్యేకంగా మానస పూజ నిర్వహిస్తున్నారు. ఈ పవిత్ర సమయంలో మనస్సుతో శివనామ స్మరణ చేస్తూ ఆరాధించడం వలన భక్తులకు శారీరక శ్రమ లేకుండానే అత్యున్నతమైన ఆధ్యాత్మిక ప్రశాంతత, శివానుగ్రహం లభిస్తాయని పండితులు చెబుతున్నారు.  

🕕 బ్రాహ్మీ ముహూర్తంలో శివుడి కటాక్షం:

సాధారణ రోజుల్లో కంటే బ్రాహ్మీ ముహూర్తంలో (ఉదయం సూర్యోదయానికి ముందు, సుమారు 3:30 AM నుండి 5:30 AM వరకు) మరకత లింగానికి అభిషేకం చేయడం అత్యంత శుభప్రదం. ఈ దివ్య సమయంలో ఆరాధన చేసిన వారికి పరమశివుడి కటాక్షం త్వరగా లభించి, ఇహపర సౌఖ్యాలు, మోక్షం సిద్ధిస్తాయని శాస్త్ర ప్రమాణాలు తెలుపుతున్నాయి.

🙏 సకల కోరికలు నెరవేర్చే విశేష అభిషేకాలు

అభిషేకప్రియుడైన పరమశివుడికి మరకత లింగ రూపంలో చేసే ఆరాధన అత్యంత శక్తివంతమైనది. ఈ ఆలయంలో భక్తుల సకల కోరికలు నెరవేర్చేందుకు ప్రత్యేక దినాలలో విశేష కైంకర్యాలు నిర్వహిస్తున్నారు:

 * ఐదు పూజల నియమం: భక్తులు ఐదు సోమవారాలు, లేదా ఐదు పౌర్ణములు, లేదా ఐదు మాస శివరాత్రులు అత్యంత భక్తి శ్రద్ధలతో ఈ మరకత శివలింగాన్ని పూజిస్తే, వారి కోరికలు నెరవేరుతాయని పురాణోక్తి.

 * మాస శివరాత్రి: ప్రతి నెలా వచ్చే మాస శివరాత్రి రోజున మరకత లింగానికి ప్రత్యేక రుద్రాభిషేకాలు, నైవేద్య సమర్పణ, సహస్రనామ అర్చనలు నిర్వహిస్తారు. * పౌర్ణమి (పున్నమి): పౌర్ణమి రోజున మరకత లింగానికి చేసే విశేష అభిషేకం అసాధారణ ఫలితాన్ని ఇస్తుంది. ఆ అభిషేక జలాలతో తీర్థంగా స్వీకరిస్తే పాపాలు విమోచనం చెంది, వైకుంఠప్రాప్తి లభిస్తుందని ఆధ్యాత్మిక వేత్తలు పేర్కొంటున్నారు.

 * ప్రతి సోమవారం: శివయ్యకు ప్రీతికరమైన ప్రతి సోమవారం నాడు మరకత శివలింగానికి ఉదయం, సాయంత్రం వేళల్లో ప్రత్యేక అభిషేకాలు, నూతన అలంకరణలు, వివిధ రకాల నైవేద్యాలతో కూడిన ప్రత్యేక హారతి సేవలు అత్యంత వైభవంగా నిర్వహిస్తున్నారు.

ఈ ప్రత్యేక దినాలలో జరిగే అభిషేక అలంకరణ సేవలు, ప్రత్యేక హారతుల దర్శనం కోసం భక్తులు పెద్ద సంఖ్యలో ఆలయానికి తరలివచ్చి, శివనామస్మరణతో పరమశివుని కృపకు పాత్రులవుతున్నారు.

🌸 భక్తుల ఆకాంక్ష: సర్వశుభాల ప్రాప్తికి మరకత లింగ దర్శనం

పాలకొండలోని శ్రీ షిరిడి సాయి ఆలయంలో ప్రతిష్ఠించబడిన ఈ అరుదైన, శక్తివంతమైన మరకత శివలింగ దర్శనం కోసం భక్తులు ఆరాటపడుతున్నారు. ఈ లింగం సాక్షాత్తు శివశక్తి స్వరూపమని, దీని దర్శన భాగ్యం లభించిన భక్తులు శివానుగ్రహంతో సంపూర్ణ జీవితాన్ని పొందుతారని, ఆరోగ్యం, అపారమైన ఐశ్వర్యం, ఆధ్యాత్మిక శాంతి వంటి సర్వశుభాలు సమకూరుతాయని భక్తులు బలంగా విశ్వసిస్తున్నారు. ఈ నమ్మకమే పాలకొండ ఆలయాన్ని ఆధ్యాత్మిక పురోగతిని కోరుకునే భక్తులకు ముఖ్యమైన గమ్యస్థానంగా మార్చింది.

పార్వతీపురం మన్యం జిల్లా, పాలకొండ మరకత శివలింగం This rare emerald Shivalinga is located at palakonda

జలాభిషేకం: పాలకొండ శ్రీ భీమలింగేశ్వర స్వామి ఆలయ దైవ రహస్యం!

 

.............. బి. శివ శంకర్ ప్రసాద్